1Cor 1 | MED | STEP | Na Pol, Got nga numan ei ndi, wi ropa tᵾpa, Jisas Kraist nga nombuⱡa rung wu mundrum ei kᵾn, tᵾn nga ana Sostenis raⱡ, moⱡpᵾⱡ mon ei ronumbᵾⱡ.

1 Corinthians 1

Pol Ndi, Korin Wamp Mbᵾ, Kuimp Tepa Mon Ropa Ngurum Ei

1 Na Pol, Got nga numan ei ndi, wi ropa tᵾpa, Jisas Kraist nga nombuⱡa rung wu mundrum ei kᵾn, tᵾn nga ana Sostenis raⱡ, moⱡpᵾⱡ mon ei ronumbᵾⱡ. 2 Mon ei, ropᵾⱡ enim. Got nga rapa tenda ila wamp met Korin kona mormin kᵾⱡ kᵾn ngonumbᵾⱡ. Kraist Jisas nga kongun itim pol ila, Got ndi, enim elim nga wamp wingti nimba, mbi ropa titim. Wote, kona mbila pora, wamp namin Nuim Jisas Kraist nga mbi tᵾndᵾtmᵾn mbᵾ pora ku. Wamp kᵾⱡ kep, tᵾl kep, Nuim ei, tᵾn wamp mbᵾ nga pora, rak ndupa morum.

3 Got tᵾn nga Tipam morum ei kᵾn, Nuim Jisas Kraist raⱡ nga wamp poⱡ ti uⱡ ei kᵾn, numan wang ndui uⱡ mbᵾ kᵾn, enim kᵾn kan pindangga!

Pol Ndi, Got Kᵾn Angge Nitim

4 Na rᵾk rᵾk enim nga nindᵾp, na nga Got kᵾn angge nᵾt. Ei nambuⱡ emel, elim ndi, Kraist Jisas nga kongun itim nit ila, enim wamp pol ti uⱡ ei ngurum. 5 Wote, Got nga ik ning uⱡ mbᵾ kᵾn, pilpa kungᵾndi ting uⱡ mbᵾ kᵾn, uⱡ kai mat pora, enim Kraist kᵾn molk, tᵾk kapⱡa endᵾk mormin. 6 Kraist nga ik mong ei, enim nga rukrᵾng orunga tepa ronduⱡ puⱡnga kᵾn, memp kai ti wak ruing ei nga tᵾk mendᵾk, tᵾn nga Nuim Jisas Kraist omba pena ila moⱡmba ei nga, nokundᵾk mormin. 8 Got elim ndi, enim ronduⱡ mundpa, kᵾmp kᵾm nokundpa pangga, wote tᵾn nga Nuim Jisas Kraist nga ui mam ila, enim kᵾn ⱡawa ti kandpa, ti natᵾmba. 9 Got nga ik ei, kupa mint petᵾm ei, mondᵾk pilᵾi! Got ei ndi, tᵾn wi ropa tᵾpa, elim nga kangᵾm Jisas Kraist kᵾn, etpa numan tenda mundrum Jisas ei, tᵾn nga Wu Nuim ei morum.

Got Nga Rapa Tenda Ila Wamp Oi Kan Pitim

10 Na nga angmᵾn kᵾⱡ, tᵾn nga Nuim Jisas Kraist nga mbi ila, na ndi, enim kᵾn ronduⱡ mundᵾp ei mel nᵾnt. Enim ik nᵾng mbᵾ, tenda mint pangga, moⱡung orunga oi kan ti, ruk ting ila pi nᵾpangga. Numan tenda pangga uⱡ mbᵾ, rak nduk etᵾk, wamp rᵾⱡaip tenda kᵾⱡ muⱡᵾi! 11 Na nga angmᵾn kᵾⱡ! Enim nga mormin ruk ting ila, ik palk enmin uⱡ ei nga, amp Klowi nga wamp mbo kᵾⱡ nga kat ndi, na kundᵾk nᵾng pint. 12 Na nᵾnt ik ei nga puⱡ ei, enim wamp tenda tenda nimba, ei nga ik elpa elpa punum. Wamp ti ndi, nimba mel, “Na Pol kᵾn mor,” nitim. I nilinga, wamp ti ndi, “Na Apolus kᵾn mor,” nitim. Wamp ti ndi, “Na Pita kᵾn mor,” nitim. I nilinga, wote wamp ti ndi, “Na Kraist kᵾn mor,” ninmᵾn.

13 Kraist ni palk, elpa elpa tᵾtᵾng muna? Pol ni, enim nga nindpa, nde peta ila kurum ei? Muna enim ni, Pol nga mbi ila nu tᵾtᵾng ei? 14 Enim nga ruk ting ila wu Krispas kᵾn Geiyas raⱡ mendpᵾⱡ, nu tᵾndᵾp wamp wei kᵾⱡ nu tindi nᵾndᵾt. Ei nga, Got kᵾn angge nᵾnt. 15 Uⱡ ei nga, akup enim wamp ti ndi, na nga mbi ila nu tᵾp kitip kᵾni wamp mor nimba mel, kapⱡa mon! 16 Wote, Stepanas kᵾn, elim nga wamp mbo kᵾⱡ kᵾn, nu tindᵾt uⱡ ei kupa. Wote, wamp ti pendᵾp, nu tindᵾt muna mon? Ei pilip kun iti natᵾnt. 17 Kraist ndi, na wamp nu tindeimp nimba, tᵾpa mundi nᵾmᵾndrᵾm mon. Elim nga Rᵾnang Ik Kai ei neimp nimba, na tᵾpa mundrum. Rᵾnang Ik Kai ei, mᵾi kona wamp nga pilpa kungᵾndi ronduⱡ pilik ik nᵾtmin ei mel, ni nᵾnimp. Ei mel int ndam, Kraist nga nde peta kurum uⱡ ei nga ronduⱡ ei, tᵾp pei mundimp mel petᵾm.

Kraist Ei, Got Nga Ronduⱡ Ei Kᵾn Pilpa Kungᵾndi Ei Kᵾn

18 Wamp kit muⱡing mbᵾ ndi, Kraist nde peta ila kurum nᵾnmᵾn ik ei, tᵾk pei mundurmᵾn. Wote, tᵾn Got etpa titim uⱡ ei ndi, ora ndupa ik ei, Got nga ronduⱡ ei, nᵾmp pᵾtmᵾn. 19 Buk Wingti ila, Got ndi, nimba mel,

“Na ndi, wamp pilpa kungᵾndi mbᵾ nga numan ei, rop mbuⱡ mbaⱡ itimp. Wote wamp mong rui mbᵾ, tᵾp pei mundimp,” nitim.
20 Ei nga, akup pilpa kungᵾndi wamp ninmin kep, wote mong rui wamp ninmᵾn mbᵾ kep, wote ik unt ngui wamp ninmᵾn mbᵾ pora, nombuⱡa nant ila mormin? Got ndi, ora ndupa kᵾn, ya mᵾi kona ila pilpa kungᵾndi kai mat ninmᵾn mbᵾ, tᵾpa pei mundrum. 21 Got elim nga pilpa kungᵾndi ei ndi, wamp nga pilpa kungᵾndi orunga kumba raⱡnga, elim kᵾn pilmin nᵾk etmin. Ei wote, pili napᵾtmin. Tᵾn ndi, Kraist kurum ni nga nimbun, ik roldᵾnga nᵾnmᵾn ila pilpa tᵾtᵾm wamp ei, Got ndi, etpa rukᵾr tᵾtᵾm. 22 Jura wamp mbᵾ ndi, uⱡ rᵾpndi ronduⱡ mat kandpᵾn, mondᵾp pilmin nᵾk pilingina. Wote, Grik wamp mbᵾ ndi, pilpa kungᵾndi ronduⱡ mat ou ndup telmina, nᵾk pᵾtmᵾn. 23 Wote, tᵾn etpa nᵾm ndam, tᵾn Kraist nde peta ila rorung ei nga nᵾndᵾtmᵾn ik ei ndi, Jura wamp mbᵾ nga numan orunga rorum. Wote, mbo wamp mbᵾ ndi, ik ei pilik kᵾn, ik roldᵾnga mat nᵾk pᵾtmᵾn. 24 Wote Got ndi, wi ropa tᵾtᵾm wamp, Jura wamp kep, mbo wamp mbᵾ kep ndi, pᵾnmᵾn ei, ya Rᵾnang Ik Kai ei, wu Kraist, Got nga ronduⱡ kᵾn, pilpa kungᵾndi tᵾpa tepa morum wu ei nga timan. 25 Got nga uⱡ roldᵾnga nᵾk pᵾtmᵾn mbᵾ ndi, wamp nga pilpa kungᵾndi numan ei, ropa mana ndurum. Wote, Got nga uⱡ ronduⱡ pi nᵾpi mbᵾ ndi, tᵾn wamp nga ronduⱡ ei, ropa mana ndurum.

26 Angmᵾn, enim Got ndi, unt wi ropa titim uⱡ ila, numan tᵾk mundᵾk pilᵾi! Enim nga ruk ting ila wamp ou ndupa, wamp nga numan ingk ei, tek muⱡi nambrᵾng. Wote, mbi moⱡpa iti uⱡ kep, wamp nuim mul uⱡ ei kep, tek muⱡi nambrᵾng mon ku. 27 Wote Got ndi, mᵾi kona wamp nga pilpa kungᵾndi ronduⱡ nᵾk pᵾtmᵾn ei, etᵾp pipil kundimp nimba kᵾn, mel roldᵾnga mbᵾ, etpa mbi mondrum. Wote mᵾi kona wamp mbᵾ ndi, mel ronduⱡ pi napᵾrᵾm nᵾk pᵾtmᵾn mbᵾ, Got ndi, etpa oⱡa tᵾpa ronduⱡ pi wamp mbᵾ, etpa pipil kundrum. 28 Mᵾi kona wamp mbᵾ ndi, kandᵾk kit pilik, tᵾk pei mundᵾk etmin mel mbᵾ, Got ndi, etpa oⱡa tᵾpa mbi mondrum. Ei nambuⱡ emel, mᵾi kona wamp mbᵾ nga mel ronduⱡ, nᵾk pᵾtmᵾn mbᵾ, etᵾp kit mundimp nimba kᵾn, Got ndi, uⱡ ei mel etᵾm. 29 Ei nga, wamp ti ndi, elim uⱡ ti int nimba, Got nga kuimp keta ila, elim nga mbi paka rui nᵾrangga! 30 Ei kᵾn, Got ndi, tᵾn Kraist Jisas kᵾn tᵾpa tenda itim. Tᵾn numan pilpa kungᵾndi tepᵾn mormin ei nga puⱡ ei, Kraist morum. Kraist elim ndi, tᵾn Got kᵾn kun kai muⱡᵾmin nimba, nombuⱡa kai ei, waka ndupa, tᵾn etpa wingti randpa, elim kᵾn rukᵾr titim. 31 Ei nga, Buk Wingti ila nimba mel, “Wamp nam ti ndi, elim nga mbi paka ruimp nimba pilim ndam, Nuim ei nga uⱡ etᵾm mbᵾ nga mint, pilpa mbi paka rundangga!” nᵾtᵾm.